News Editor

Bya Willy Kamya

KAMPALA

OMUYIMBI Mark Bugembe amanyiddwa ennyo nga Buchaman ebintu byongedde okumwonoonekera, Muky. Lucy Nakyobe owa State House abadde yakamwegaanira mu Palamenti nti mu bawabuzi ba Pulezidenti Museveni tamanyiddwa, ssente za Gen. Salim Saleh obukadde 200 zeyalidde ku baana ba Ghetto ne zimuzaalira akabasa! 

Abavubuka ba Ghetto bamugobye ku bwapulezidenti era ne bamulabula nti bwe kanamutanda n’asalimbira mu nfo zaabwe, baakumutemako okugulu okw’okubiri, atambulire mu kagaali nga bamulanga obunnanfuusi.

Ekifo kye bakirondeddemu mwanamulenzi mutaseka ‘Hired Gun Moyes’ ng’amannya ge amatuufu ye Joseph Bukenya.

Ono yeyawangudde akalulu oluvannyuma lw’okuttunka okw’amanyi wakati wa Kabaaya, Mark ow’e Kamwokya ne Kaka owe Nakulabye.

Paddy Sserunjogi amanyiddwa nga Sobbie eyabadde asuubizza  naye okwesimbawo kyokka okulonda olwatuuse, n’atalabikako.

Okusinziira ku Sandra Nakakeeto amanyiddwa nga Ssenga wa Ghetto mu Uganda, “Nga 21/12/2019, nze ne Buchaman, wamu n’abavubuka ba Ghetto twagenda ewa Gen. Salim Saleh n’a atuwa obukadde 200. Twalowooza Buchaman anaakozesa ssente zino okukyuusa embeera z’abaana ba Ghetto kuba gwe gwali omulamwa naye yazeezibika.

Twalabye talina lugendo,  kwekumufumuula, ne tulonda Moyes ku bwapulezidenti kuba amanyi  ebiruma abaana ba Ghetto.”     

Olwalangiridde Moyes ku bwapulezidenti, ne bamusaba atandikirewo okutalaaga enfo za Ghetto ez’enjawulo nga mu zino mulimu Kasokoso ne Kawaala gyeyasookedde, era tukitegeddeko nti wakutalaaga eggwanga lyonna.

“Ekitutwala mu Ghetto ez’enjawulo, ye pulezidenti waffe omupya okuwuliriza ebizibu ebiruma abavubuka era oluvannyuma, wakusisinkana omukulembeze w’eggwanga abimuloopere.” Ivan Nyombi, ssentebe wa National Ghetto Task Force, bweyatugambye.

Yagambye, ekibaleese, kwekulabula Pulezidenti Museveni okwewala Buchaman kuba abaana ba Ghetto tebamulabawo, balina obukulembeze baabwe ng’enteekateeka z’okubakulaakulanya n’okukyuusa obulamu bwabwe,  ssaako okumukuyegera akalulu, ziyisibwe mu bukulembeze abaana bwebakkiririzaamu. 

Ivan y’abadde ddereeva wa Buchaman ng’abadde akozesa mmotoka ze okumutambuza kyokka olwafuna obukadde 200, n’amugoba n’emmotoka ye, olwo loodi ne yeeyiwamu kapyata.    

SSENGA WA GHETTO AYOGEDDE

Mu mboozi ey’akafubo ne Ssenga yatugambye,  “Mbadde ntambula mu Getto zonna kubanga abantu banzikiririzaamu.”

Yatutegeezezza ng’abaana mu Ghetto ezenjawulo bwe bamutuukirira ne bamugamba, “Ssenga ffe tetwagala Buchaman. Twali twamwerabira dda okuva lweyayawukana ne Bobi Wine nga tetumulaba mu Ghetto ebbange lyonna. Talina ky’agenda kutukolera era oyo tayinza kubeera Pulezidenti waffe.

Wonna wetumulabirako ng’asalimbira mu ghetto zaffe, tugenda kumutemako okugulu kwe okwokubiri abeere ng’atambulira ku kagaali akimanye nti tetumwagala era takiikirira ndowooza zaffe.”

“Nga Ssenga wa Ghetto, nagenda ewa Buchaman ne njogeramu naye ategeere ebizibu ebiruma abaana era ne mutambuzaako mu nfo ez’enjawulo. Nakizuula nti yali tannafuna ssente okuva ewa Muzeeyi ng’abamu ku bavubuka bwe baali balowooza.” Ssenga wa Ghetto, ng’abeere Magere bweyatugambye.

Ono abaana ba Ghetto gwebasinza okusinziira olw’engeri gy’ananguyiramu yagambye, “Nze nakozesanga ssente zange ne ngulira bakomanda emmere ababeranga ewa Buchaman ng’olwo ye ali yala.”

“Ewa Buchaman e Luwafu mu Makindye waliwo ekyoto,  nga ku Kyoto ekyo abaana basiiba ku njaga. Naye bwe namubuuza, naye  ddala, ‘Buchaman abavubuka bano obateeseza ki singa baba bakuyise ewa Pulezidenti,’ ko ye, ‘Ssenga, tewali nnyo ky’amaanyi naye naawe ebyaffe obimanyi, asatu mu bbanga,  abiri ku nnyama.’ Bino byanneewunyisa.” Ssenga Ghetto bweyatugambye.

Yategeezezza nti yawabula Buchaman, nti ebya ‘asatu mu bbanga, abiri ku nnyama’ si gwe mulamwa gw’abavubuka bo mu ghetto. 

“Namusaba, bw’aliba atuuse ew’obukulembeze w’eggwanga,  amutegeeze nti abavubuka ba Ghetto bangi abalina emirimu mu mitwe, okuli abasobola okwokya ebyuuma, okusiba ‘pavers’, okubajja, okukuba bbulooka z’omusenyu, n’emirimu gy’omumutwe emirala. Nga bano betaaga kukwatako, bakole bave mu kulera engalo.” Ssenga wa Ghetto bweyatutegeezezza n’agattako nti, “Olwo ate abo abatalina mirimu gya mu mitwe,  baterwewo ebifo nga webooleza mmotoka, pulojekiti ng’ezo zibayambe okwekolamu ebibiina bya Sacco ez’enjawulo nga basobolera okutereka akasente, bw’ossaako n’aka akasente Pulezidenti k’aba abongereddeko, olwo beekukulaakulanye.”

Yagambye, kino kyokka ky’ekisobola  okukendereza ddala abo abokya ebipiira n’abakulemberamu okwekalakaasa.

“Mu kunnyanukula, Buchaman yannewunyisa bweyangamba nti, ‘Ssenga sooka ondekemu mmale okutambuza ekintu kyangu, nze njagala kulima njaga. Era bwenatuuka ewa Pulezidenti,  nja kumusaba angulireyo a akanyonyi mwentambulira.’Namubuuza, ennyonyi n’enjaga gy’ayagala okulima,  bigenda kuyamba ki abavubuka bano Ghetto? Kyokka nga by’anziramu biraga,  Buchaman yefaako era yeyagaliza yekka.” Ssenga wa Ghetto bweyatugambye.

‘NNALIWO NGA GEN. SALEH AMUWA  OBUKADDDE 200 NAZEEZIBIKA’ 

Ssenga wa Ghetto ono abadde tava ku lusegere lwa Buchaman, yatunyumirizza ebyaliwo Gen. Saleh lweyawa Buchaman obukadde 200 n’ategeeze nga bweyali agenda okuzikozesa okusimba amasamba g’enjala agaggawale! 

Yatugambye, bwebagenda ewa Gen. Saleh,  Buchaman yaweebwa obukadde 200. 

“Nalowooza nti ssente zino tajja kuzezza yekka. Yasuubiza bakomanda ba zi ghetto akasente. Kyokka teyabawa. Ffe yatuwaako emitwalo etaano etaano ku bukadde 200.Waaliwo abavubuka ba Sobbie abaava mu Kisenyi, bano twali nabo ewa Gen. Saleh kyokka tuba tukomawo ne baamusalako nga tukomawo, ne bamukiika mmotoka era n’abawako obukadde kkumi.” Ssenga bweyatunyumirizza.

Buchaman ne ttiimu ye batuukira Kawanda ku bbaala,  olwo n’atandika okugulira abaana omwenge era awo we webyakoma,  baddamu kumulaba nga yeevugira mu kapyata wa Ragius.

“Kino kyannyongera okunkakasa nti ddala Buchaman talina mulamwa, tali ku nsonga za Ghetto, era tebaayo alimba Pulezidenti nti abavubuka ba Ghetto bali ne Buchaman.” Ssenga nga kati atambula ne Pulezidenti waffe Ghetto omupya, bweyatugambye.

Ye Black messiah ng’ono yeyogeddeko ng’akola ogw’okutunda enjaga mu zi Ghetto yagambye bo Buchaman tebamumanyi mu nfo zaabwe, oyo yenna abaagala ayitire mu Pulezidenti waabwe Moyes okubatuukako. 

SSENTE BAZINZIBAKO – BUCHAMAN

Bwetwatuulkiridde omu ku bantu ba Buchaman ab’okulusegere yatugambye, ssente Gen. Saleh zeyamuwa abayaaye bamusalako ng’azireeta e Kampala, a abamulanga okuzibalyako, bamulanga bwemage.   Ku Lwokutaana,  Pulezidenti wa Ghetto omupya akawungeezi yakamazeeko alambula ghetto z’e Kawaala.

Bya Musasi waffe

KAMPALA
EMIRIMU egisoba mu mitwalo ebiri egitereddwawo aba kkampuni ya Tondeka Metro egenda okuddukanya bbaasi empya 980 ezijja mu Kampala okumalawo obulippagano bw’ebidduka, giweereddwa bakondakita ne baddeereva ba ttaxi nga Pulezidenti Museveni n’Obwakabaka bwa Buganda bwe baalagidde.  

Ebisanyizo ebisabiddwa baddereeva ba ttakisi abanaavuga bbaasi bibacamudde nnyo, Mustafa Mayambala akulira ekibiina kya UTRADA ekibagatta agambye byonna babirina era besunze emirimu gino.  

Mayambala atugambye, “Badereeva basanyufu olw’emirimu bannaffe aba Tondeka gyebawadde badereeva ne bakondakita ba takisi, kino kyennyini kyetwasaba Pulezidenti Museveni nti enkulaakuluna yonna ejja, bannyini mulimu gw’okusaabaza abantu be bateekwa  okusoosowazibwa.

Kituukiridde era tuli basanyufu.”Pulezidenti Museveni ne Katikkiro wa Buganda Owek. Charles Peter Mayiga baalagira aba Tondeka, emirimu gy’okusaabaza abantu giweebwe baddeereva ba ttakisi, ekyakoleddwa.

Bbaasi empya 980, omwaka guno wegunaggwerako zinaaba zonna zituuse mu Kampala era nga zisikidde ttakisi mu kusaabaza bannakampala nga bwekiri mu bibuga by’amawanga agawerako.

Okusinziira ku ba kkampuni ya Tondeka, bbaasi 400 zituuka mu mwezi gwa mwenna,  bbaasi endala 200 zijja mu mwezi gwa kkumi, endala 200 mu November ate  180 zijje mu December.Zo ezigenda okukozesebwa mu kuyigiriza ba ddereeva ba ttakisi okuzivuga, zituuka mu mwezi gwa mukaaga omwaka guno. 

EBISABIDDWA ABA TTAKISI OKUVUGA BBAASI  

Okusinziira ku kirango ekyafulumiziddwa aba kkampuni ya Tondeka, abavuzi ba tatakisi bonna abakolera mu Kampala, Mukono ne Wakiso bategeezebwa nti wajja wakubaawo okusunsulwamu okufuna abo abanaavuga bbaasi za Tondeka basole okutendekebwa okunasasasulirwa kkampuni ya Tondeka.
“Osabibwa ggwe omuvuzi wa Taxi okutegeka ebiwandiiko bino wammanga nga birina kuleetebwa ggwe nnyini wabyo mu bwangu.” Ekirango kya Tondeka bwekigamba.

Mu bino mulimu: 

1. Ndagamuntu yo ey’eggwanga

2. Pamiti gy’olina kati ekukkiriza okuvuga mmotoka

3. Ebbaluwa ekakasa siteegi kw’okolera ng’essiddwako emikono ebiri egy’abamu ku baddereeva banno bwe mukola

4. Ebbaluwa ya LC mu kitundu gy’osula.

EKIRAGIRO KYA M7 KU BBAASI EMPYA

Mu baluwa ya Pulezidenti eri minisita w’ebyenfuna Matia Kasaija eya nga 31/07/2018 yagamba, “Bwenasisinankanye aba Hinduja Group ku by’okusooka okutuwa bbaasi 980 ez’ekika kya Asok- Leyland nakkirizza batuwe bbaasi ezozonna nga ziva Buyindi ate oluvannyuma, bazimbe wano kkampuni mwebanaakolera bbaasi endala ezinaakozesebwa okusaabaza abantu baffe.”
“Bbaasi zino nzikirizza, zikolere ku nguudo mwasanjala zonna eziyingira mu  Kampala wakati ate era kkampuni ya Asok ngiragidde esseewo enkolagana ne kkampuni yaffe wano eya Kiira Motors. Oluvanyuma lwa bino byonna, bbaasi zino zaakuddira bannayuganda abanaaba baguzeemu emigabo.” Ebbaluwa ya Pulezidenti bw’esoma.
Okusinziira ku kiragiro kya Pulezidenti, takisi si zakugobwa wabula, tezijja kuddamu kukolera mu Kampala wakati, nga zijja kukolera eyo ebbali bbali munda nga bweziyiwa abasaabaze ku luguudo bbaasi wezinabajjanga.
Zino z’ezimu ku nteekateeka gavumenti zeyaleese okumalawo omugotteko gw’ebidduka mu ggwanga Pulezidenti ennaku ezo gweyagamba nti gulemesa bamusigansimbi okujja wano nga singa bbaasi zinatandika okukola, zigenda kuba zisaba obusente butono nnyo ate nga mpitirivu, ekinaabakiteetaagisa bbanyini mmotoka ntono kuzireeta mu Kampala.
“Obutafaananako nga bbaasi endala ezibaddewo, aba Ashok baleeta bbaasi mpitirivu nnyo ate omulundi gumu. Kkampuni ezireeta ezze ezigaba mu mawanga n’ebibuga ebiwerako era zikola bulungi, mpangaazi, zisobola embeera ya Afrika, ate bw’ozituulamu obeera ng’ali mu nnyonyi.” Aba Tondeka bweyagambanga. Bategeezezza nti, ” Obukulembeze bwonna obunaaziddukanya bugenda kuteekebwateekebwa bulungi, nga bulina obukugu mu mulimu guno ate nga buli nnyo mu bantu ba bulijjo abalinnya mmotoka za lukale.” Aba Tondeka bwebategeezezza.
Bbaasi zino za kuyitibwa ‘TONDEKA’ nga za kika kya JAN, ekimu kw’ebyo ebika ebisinga obuwangaazi.
Mu kafubo ka Pulezidenti n’aba Hinduja Group, bakkiriziganyizza ku migaso gya baasi okusaabaza abantu mu bibuga nga bwezikendereza ddala ku buzzi bw’emisango era n’essente ezisasaanyizibwa mu by’okuketta obuzzi bw’emisango.
Abakulu baakirabye nti okutambulira mu bbaasi kuba kwa ddondolo nnyo, abaana abasoma, abakyala abaola mu butale, abavubuka ababa bagenda ku mirimu gyabwe ssaako abakadde n’abo abaliko obuleme.
“Mu mawanga bbaasi zaffe gyezisaabaza abantu, toyinza kusanga bulippagano ku nguudo, abakozi batuukira mu budde ku mirimu gyabwe. Eby’entabula biba birabika bulungi era n’enguudo zikuumibwa bulungi nga zitukula.” Aba Hinduja bwebaakakasizza pulezidenti.
Bagambye Pulezidenti ng’abatambulira mu bbaasi zino
bwebakekkereza ennyo, era amaka mangi agabadde gakozesa entambula za lukale, gagenda kuba nga gafissaawo nnyo ate nga baweereddwa empereza eri ku mutindo gw’ensi yonna.

EBIBUGA EBIRALA EBIKOZESA BBAASI 
Ebibuga mu Afrika bbaasi za Hinduja gyezikolera kuliko;  Dakar, Lagos, Abuja, Abidjan, Accra, Luanda n’ebirala bingi.
Gavumenti eyatutte obudde ng’enoyereza bbaasi zino yagambye za kikungu nga zijja kutambuliza abantu mu nbeera eyeeyagaza.
Okusinziira ku byakkanyiziddwako abakulu, aba Hinduja bagenda kutikkulira mu ggwanga sipeeya wa bbaasi zino era entendeka bannayuganda okuzikanika.
Amaduuka ga sipeeya wa bbaasi gakuteekebwa mu bitundu mu Kampala eby’enjawulo.

Bya Musasi waffe

NAKASEKE

EYALIKO  Ssaabaminisita wa Uganda John Patrick Amama Mbabazi alidde ‘esswaga’ ku bikujjuko by’amagye ga UPDF e Nakaseke bw’atuukidde mu kitiibwa bagenero ne bamukubira ssaluti ssaako abanene mu gavumenti okulwanira engalo ze n’akafuba olwo ababisomera mu bbaasi ne batandika nti y’aliba ddala nga ye musika w’omukulu! 

Mbabazi eyabadde anekedde mu ssuuti eya ggule ng’asibye n’ettaayi eya kakobe olutuuse, baminisita ne bagenero bonna ne bayimirira mu ngeri y’okumussaamu ekitiibwa olwo n’agenda ng’ababuzaako ng’eno abanene mu magye bwe bamukubira ssaluti ez’okumukumu ezitera okukubirwa Pulezidenti.

Bweyatuuse ewa Gen. Salim Saleh muto wa Pulezidenti Museveni,  Mbabazi n’amugamba, “Saleh ondyako biki, ng’ogezze nnyo?” Olwo bonna ne baseka. 

John Mitala, omuwandiisi wa kabineeti yasituse mu ntebe ye agenda abuuze ku Mbabazi ng’oli kyangu okulowooza nti Pulezidenti yeyabadde atuuse.  

Olwagenze awabadde bannamagye Gen. David Muhoozi aduumira UPDF ne Maj. Gen. Sabiiqti Muzeeyi amyuuka Ssaabaduumizi wa poliisi, yabasanze besimbye bwantongo nga bombiriri baalabiddwa nga beemenyako okumubuzaako.

Embeera eno yatutte eddakiika ezaasobye mu kkumi nga buli munene mu gavumenti alwana okubuuza  ku Mbabazi. 

Oluvanyuma yaweereddwa entebe mu weema y’abakungu mweyatudde nga wayiseewo eddakiika ntonotono,  Pulezidenti Museveni naye n’atuuka. 

KIKI EKIKOMEZZAAWO MBABAZI

Kyonna Museveni ne Mbabazi kyebabala, kikulu!

Kumpi gibadde gigenda mu  myaka etaano nga Rt. Hon. Amama Mbabazi talinnya ku mikolo gya gavumenti oluvanyuma lw’okusoowagana n’eyali mukamaawe Pulezidenti Museveni era n’afumuulwa  ku Bwassaabaminisita n’obwassabawandiisi wa NRM mu 2014.

Mbabazi kwekwesuulamu jjulume ne yeesimba ku Museveni ku bwapulezidenti era yonna gyeyakuba enkungana yasaba abalonzi bamuwe obululu abaggye mu  bwavu, obubbi n’obulyake Pulezidenti Museveni bw’abataddemu. 

Ebyalangirirwa mu kulonda Mbabazi yabiwakanya  era n’addukira mu kkooti ensukkulumu ng’agamba ye bukya abaawo, talabanga bubbi bw’akalulu nga obwaliwo. mu 2016.

Mu kkooti nayo, Museveni yamusingirayo, kwekugyira nga y’esonyiwa eby’obufuzi.

Wabula ennaku zino,  Museveni ne Mbabazi omukwano gujula na kubasaza mu kabu ng’abatunuulizi b’ebyobufuzi batandise dda okubyogera nti omukulu y’aliba nga yamukomezzaawo, amuteere ekintu.

Emabegako awo, Museveni yaliko mu maka ga Mbabazi ng’afumbiza muwala. Ababiri bazzeemu okubeerako bonna ku ffamu ya Pulezidenti e Kisozi nga obulundi ogubadde gukyasembyeyo, baabadde mu ggwanga lya Togo ng’ate Mbabazi y’ayaniriza Museveni, ekyalese abatunuulizi b’ensonga nga batakula emitwe ku kibalo ky’abakulu.

Bya Musasi waffe – KKOOTI

WEZINAAWERERA ssaawa munaana leero, kkooti ya Buganda Rd enaaba ekubyeko bugule abawagizi b’omupiira n’abantu b’e Kasubi, bwebanaaba bazze okubeerawo ng’abajulizi ng’omulamuzi Ayo Miriam Okello awa ensala ye oba munnaabwe Jackson Ssewanyana abangi gwebamanyi nga ‘Uncle money’ omuwagizi wa Cranes lukulwe alina omusango okwewozaako.

Ono amaze akabanga ng’attuunka n’omusango gw’okutta omuntu mu butanwa.

Uncle Money nga y’amyuka ssentebe w’ekyalo Kasubi Zone VI , yasindikibwa ku metre e Luzira ne munne Benson Ssenyonga ng’ono ye Defensi w’ekyalo oluvanyuma lw’okuggulwako omusango gw’okutta Siraje Tumusiime mu butali bugenderevu.

Tumusiime yattibwa nga 16/08/2019 oluvanyuma lwabatuuze okumutebereza okubeera omubbi nga bano batwalira amateeka mu ngalo ne bamukuba amayinja n’emiggo egyamuttirawo era ekyaddirira ye poliisi okukwata abakulembeze beyalumiriza nti bebaali bakuliddemu abantu okutwalira amatteeka mungalo .